KKK beim „Fanclub Pinzberg“
Hams des CLUBmagazin zum Heimspiel gegen den 1.FC Köln glesn? Da war scho a haufn Interessantes über den Fan-Glubb in Pinzberg gstandn. Abber, der Hausbesuch war widder so interessant, dass nu viel mehr zum Lesen und vor allem Horchn gibt.
Der 1. Vorstand von die Pinzberger iss der Markus Kreller.
A richtiger Glubberer, mit Fahna vom 1.FCN im Garten.
„Die hams mer fei scho zwaa mol aus meim Garten rausklaut.“
Zum Saison-Ausgang hat er sei ganz eigene Vision. Er tippt auf Relegation, und zwar gegen Färd.
„Mer muss dena scho amol zeign, wo der Hammer hängt, wer die Nummer Eins im Frankenland iss.“
Horch’ns nei in sei Interview: Markus Kreller
Der Helmut Zametzer, Gründungsmitglied, iss scho ewig Glubberer. „Mir sin amol zu die 60er nunter nach München gfahrn. Und bei der Raststätte Holledau freggt unser Auto. Kehlheimer ham uns in ihrm Jeep mitgnumma. Zu fünft war mer in dem Ding ghoggt, des bloß für vier zuglassn war. In der Halbzeit hamer versucht, in aam Bus unterzukumma. Hat net highaut, aber 12 Saidli Bier hamer für uns vier organisiert. Mir ham 1:0 verlorn, sin mit der Bahn hamgfahrn. Für’s Taxi von Forchheim ham nach Pinzberg hamer kaan Pfennig mehr ghabt. Ja, mit unserm Glubb, da erlebst du immer was!“
Der Zametzers Helmut hat a am Weißen Sunntag seiner Schwester - da war er 11 Jahre alt - was erlebt mit seim Glubb; wegn dem Deutschn Mastertitel 1968 hat er aus dem Weißen Sunntag aan Blaua Sunntag gmacht – horchn’s nei, des lohnt sich:
A Original, der Harry Glauber.
Er kummt ins Schwärma, wenn er an seine vieln Heimspiele in Nemberch denkt. „Da steigst in Nemberch aus’m Bus aus und dann des schwarz/rote Fahnameer, einmalig!“ Der Harry, a richtiger Fan. Der mag die Freindschaft mit dem andern deutschn Traditionsverein, die Schalker. Mag die Stimmung, mag aber kaani Hooligans. Hörn’s nei:
Zum Schluss der Georg Messingschlager. Über 950 Spiele hat er als Vorstopper für Pinzberg gmacht.
Sei Spitznama: Pinzberger Beckenbauer.
Er schwärmt vom altn Zabo, schwärmt vo die Zeitn mit Strehl und Morlock, und gibt a Prognose ab, wie’s heier ausgeht mit unserm Glubb.
Gscheid interessant.
Ich hätt dem Georg, dem Pinzberger Becknbauer, stundenlang zuhörn kenna.
Gerog Messingschlager, der "Pinzberger Beckenbauer"
Also, der Hausbesuch in Pinzberg, des war a Reise wert!
Soll i a zu eich kumma?
Schreiben müsst Ihr - kumma tu ich!
Und etz iss aus,
ade sagt der
Klaus Karl-Kraus
